Mbi 500 pjestarë të ish TMK-së kanë përfituar nga Programi i Risistemimit

Në kuadër të programit të Ri-sistemimit të pjesëtarëve të TMK-së, që nuk janë pjesë e FSK-së, deri më tani kanë përfituar mbi 500 persona.

Mbi 80% e tyre janë përcaktuar për përkrahje në themelim biznesi/vetëpunësim, përkrahje e cila tashmë iu është dorëzuar.
Pjesa më e madhe e përfituesve të grantit për themelim biznesi janë përcaktuar për aktivitete të ndryshme të bujqësisë, por ka edhe të atillë që janë përcaktuar për përkrahje ne zhvillim të biznesit në fushën e ndërtimtarisë, transportit të mallrave dhe njerëzve, teknologjisë informative e deri tek pajisja me vegla muzikore për zhvillim të veprimtarisë në këtë fushë.

60 persona kanë përfituar nga ndërmjetësimi në punësim, prej tyre tre janë punësuar ne sektorin publik ndërsa pjesa e mbetur në sektorin privat.

Sa i përket trajnimeve profesionale, kandidatët të cilët janë përcaktuar për këtë formë të përkrahjes, janë duke u trajnuar në qendra trajnuese të njohura në Kosovë, siç janë: Mitrosoft në Mitrovicë, AFAS në Prishtinë dhe Qendrën Trajnuese të KEK-ut në Kastriot. APPK ka bashkëpunim të shkëlqyeshëm me shumicën e Qendrave Trajnuese në Kosovë, prandaj edhe të gjithë kandidatët që shprehin interesim për këtë formë të përkrahjes, do të ndjekin trajnimet e zgjedhura nga ata në institucionet më të mira trajnuese në vend.